Er du vårt nye medlem i sportsleg utval?

FBK Voss søker etter nye representant/ar i sportsleg utval (SU).

SU er ein del av kvalitetsklubbprosjektet og implementeringa av sportsplanen. Utvalet er samansett av fleire personar som skal bidra til at klubben skal nå sine sportslege målsetjingar, og at den sportslege aktiviteten i klubben vert gjennomført heilskapleg og i samsvar med sportsplanen. SU er det øvste rådgjevande organ for styret i FBK Voss i sportslege spørsmål, og skal gje tilrådingar basert på sine drøftingar og sitt fotballfaglege skjønn.

SU si primære oppgåve er å leia arbeidet med å gjera sportsplanen til eit levande dokument i trening- og kampkvardagen til klubben. SU skal bidra til å avklare eventuell sportsleg usemje og tolke sportsplanen.

Andre oppgåver

• SU innstiller på val av hovudtrenar for klubben sine resultatlag (Dame og herre 1 og 2), og legg dette fram for styret for handsaming og tilsetjing.

• SU rekrutterer og engasjerer trenar for klubben sine lag i ungdomsfotballen.

• SU vera kontaktleddet mellom trenar- og spelarrettleiarteam og klubben sitt styre.

Me søkjer ein/fleire personar som brenn for spelar og klubbutvikling. Me vil ha deg med på laget som har fagleg kompetanse innan fotball, og som vil bidra positivt på den sportslege utviklinga i klubben. Du må vera engasjert, og ha gode samarbeidsevner. Det vil verte lagt opp til nokre møter på kveldstid. Men her har du ein god moglegheit til å påverke utviklinga til FBK Voss sine lovande fotballspelarar i ein positiv retning. Me treng fleire som kan bidra for klubben vår!

Ved spørsmål eller interesse kontakt:

Maid Memic, [email protected]

Roger Hovland, styreleiar.

Øystein Ygre Skorve, styremedlem sport.